Satua Bali I Lutung Teken I Kakua Mamaling Isen

 I LUTUNG TEKEN I KAKUA MAMALING ISEN

 

Inggih Ida Dane sareng sami sane wangiang titiang, sadurung titiang nyaritayang satuane "I Lutung teken I Kakua Mamaling Isen", pinih riin ngiring ngaturang panganjali umat,

 

“Om Swastyastu”

 

Kacarita I Lutung masusupan murang-murang lampah, saget tepukina I Kakua nginyah di sisin abinge. I Lutung matakon, "Ih Kakua, iba ngudiang ditu?". I Kakua masaut nimbal, "Wake nginyah dini, awak wakene dingin, mara suud malebleban". "Iba lutung teka uli dija, tur lakar kija jani?".

I Lutung nyaurin, "Pajalan wakene mula murang-murang lampah lakar ngalih babungkilan". "Sedeng melah iba tepukin wake, jalan masawitra ajak dadua, jele melah bareng-bareng!". "Uduh iba kakua, jalan luas ngalih amah-amahan! Cekuh jaene nedeng mokoh-mokoh. Ditu di abian Dukuh Kantrungan". Keto munyin I Lutunge.

Ajaka dadua lantas ka tegal dane Dukuh. "Nah sedeng melaha suung, jalan enggalang macelep", lantas ajaka dadua lakar ngokoh isen. Sedeng iteha ajaka dadua ngokoh isen, saget teka Dukuh Kantrungan ngaba tumbak sarwi nimpugin. I Lutung ngenggalang menek ka punyan kayune, I Kakua nylisih mengkeb beten tengkulake.

 

Dane Dukuh ngalih-ngalihin I Kakua, saget I Lutung magending munyine ngrempiang.

I Kakua beten tengkulak

I Lutung babuan di kayu

Siut lalah

Ngamah isen

Jero Dukuh ngalih-ngalihin I Kakua

Tusing bakatanga

 

I Lutung buin magending

I Kakua beten tengkulak

I Lutung babuan di kayu

Siut lalah

Ngamah isen

 

Dane Dukuh laut ngungkab tengkulake, I Kakua nyaru-nyaru pules, lantas jero Dukuh nadtad kakuane abana mulih.

Teked jumah, dane Dukuh ngaukin pianakne, "Luh Ayu mai enggalang paekin Bapa, Bapa ngapgapin be jaen pesan! Luh Ayu Kantrungan enggal nyagjag sarwi matakon, "Ulam napi niki Bapa?". Bapane masaur, "Cening Ayu, ene madan kakua, yan anggon lawar sate melah pesan, apa buin timpalin arak berem, nasi baas barak".

Kakuane celepanga di krangkenge, "Ih iba kakua, apa amah-amahan ibane?". Keto patakone jero Dukuh. I Kakua nyaurin, "Inggih jero Dukuh, sane satata teda titiang wantah kulit bantal miwah kulit pisang kuning".

Dane Dukuh ngencolang luas ngalih kulit bantal muah kulit biu kuning. Disubane maan lantas enggal abana mulih. "Cening Ayu ene kulit bantale baang I Kakua. Bapa ngracik basa malu". Ni Ayu Kantrungan ngaba kulit bantale ka krangkenge. I Kakua kendel pesan. Ni Ayu ngencolang ngoopin bapane ngulig basa. Saget teka I Lutung nelokin I Kakua. Disubane kacunduk I Lutung kedek ingkel-ingkel, "Kaden wake iba suba bangka". "Uduh iba lutung, pelih pesan tatenger ibane ngaden wake suba mati. Dini wake mataga amah-amahan. Buin kejepan wake lakar kaantenang ngajak Ni Ayu pianak jero Dukuh. Ento iwasin Ni Ayu Kantrungan sedek ngaenang  wake boreh. Kasugihan dane Dukuh suba makejang kaserahang teken wake". Mara keto pasaut I Kakua, lantas I Lutung ngomong, "Duh Kakua, tugtugang legan ibane makanti, jele melah bareng-bareng". I Kakua masaut, "Uduh Lutung yan buat ento saja pesan buka munyin ibane, jani iba suba nyilurin wake dini dadi penganten".

Ceritayang jani I Lutung nglincak di krangkenge sambilanga makejit ngincang. Ni Ayu Kantrungan tangkejut nyingakin ada Lutung di krangkenge. "Bapa Wenten bojog ring krangkenge", keto raos Ni Ayu. Jero Dukuh ngenggalang ka krangkenge. I Lutung ngencolang mamunyi manis, "Inggih jero Dukuh, pacang kudiang titiang mangkin?". Dane Dukuh nyaurin, "Iba lakar tampah wake, anggon ebat, timbungan muah kuah ares. Polon ibane lakar pes wake isinin basa bawang. Wake suba mapenga tuak abungbung. Ne iwasin pangiris wakene mara suud masangih". I Lutung nimbal nyawis, "Inggih jero Dukuh, mangdene jerone uning, titiang ngaturang indik". "Nah lautang iba nyatuang apang wake tatas nawang". Masaut I Lutung, "Inggih jero Dukuh, sane mangkin titiang nguningayang, sapunapi carane ngolah ulam Lutung mangda becik. Jero Dukuh, ri kala jerone mademang titiang, sampunang icene getih titiange medal, mangdane titiang padem, tur rasan olahan titiang becik. Puniki muncuk ikuh tiange tunjel janten sampun tiang padem. Mangkin bebed dumun ikuh tiange antuk gilingan kapas miwah duk raris tunjel. Gelisang satua enggal, ikuh I Lutunge suba kakaput laut kaenjutin. disubane apine gede, I Lutung ngencolang makecog ka raab umah jero Dukuhe kanti telah puun. Ni Ayu ngajak memene ngeling tur kabarat-kabirit katulung-tulung. Somahnyane jero Dukuh ngopet, kene suba upah awak belog, ngugu munyi manis, tuara nawang ejite kabandilin. Nampi munyi patut pinehin tur resepang malu, apang tusing gangsaran tindak kuangan daya.

Ceritayang I Lutung malaib laut nyemplungang awakne di yehe kanti apine mati, lantas I Lutung buin masusupan ka alase.

 

Inggih Ida Dane sareng sami sane wangiang titiang, amunika prasida antuk titiang nyaritayang satuane "I Lutung teken I Kakua Mamaling Isen". Kirang langkung antuk titiang nyatuang, titiang nunas majeng ring Ida Dane sareng sami Badung Mangupura, kirang langkung titiang nunas ampura. Puputang titiang antuk Paramasanti.

 

“Om Santi Santi Santi Om”