Satua Bali Crukcuk Kuning

 CRUKCUK KUNING

 

Ada katuturan satua di desa anu anak makurenan ngelah pianak dadua, maka dadua luh-luh. Ane kelihan madan Ni Bawang, ane cerikan madan Ni Kasuna. Solah anake cerik ento matungkasan pesan. Ane kelihan jemet tur bisa matilesang awak lacur muah ia bisa menyama braya, ngeraos pelapan muah bakti teken anak tua. Adine Ni Kasuna sesai ngraos bangras tusing ngitung teken nyen ia ngomong. Solahne demen ngudag-ngadug sakewala ia sayange pesan baan memene.

Sedek dina anu ajaka dadua kaukina baan memene, “cening Ni Bawang keto masi cening Ni Kesuna”. “Buin mani semengan meme lakar luas ka peken ngaba dagangan muah meli kaperluan sadina-dina”. “Cening ajak dadua tuunang padine uli di klumpune lautang tebuk”. “Tuni meme tusing maan nebuk, tusing ngelah baas jakan buin mani semengan”. Masaut pianakne sebarengan “nggih meme, nyanan tiang ja nebuk”.

Semengan disubane memene luas ka peken, ditu ngencolang Ni Bawang nuunang padi laut abana ka umahne ketungane. Ni Bawang ngaukin Ni Kasuna nunden nulungin nebuk, nanging Ni Kasuna matinda malu “embok malu nebuk nyanan tiang ngalesung. Buin Ni Bawang nebuk. Disubane padine nyandang lesung kaukine adine “Kasuna mai anake lesung!”, masaut adine “lesung ja malu nyanan tiang napinin”. Kanti Ni Bawang suud nyakan adine mase tusing nyak nulungin, itep ia di kamare dogen gaenina.

Kacarita jani Ni Bawang luas kayeh sambilanga ngaba jun ngalih yeh inem, ngencolang Ni Kasuna pesu ka umah ketungane ngalih oot, laut uape awakne aji oot.

Buin akejepne teke memene uli peken tepukina ni Kasuna bek misi oot. Ni Kasuna nuturang ia padidi ane magae Ni Bawang tusing nyak bareng, mapayas dogen gaene. Ditu memene pedih paningalane barak gigine ngeretek. Mara Ni Bawang Teka uli di kayehan tan pasangkan memene nyemak kayu laut nigtig Ni Bawang. Ni Bawang gelur-gelur ngeling sambilanga matakon, tan taen teken unduk. Memene sumangkin galak tur nundung Ni Bawang.

Tan kacaritanan di jalan saget ia neked dialase, negak ia dibatan kayune sambilanga ngeling maseselan, tur nunas teken dewan alase apange enggal cabute uripne karana ia tusing nyidaang naanang sakit awakne balan matigtig. Saget ada crukcuk kuning matinggah di carang kayune, laut tundene nyototin sirahne apange ia enggal mati. I Crukcuk Kuning ngidep munyi laut nyototin sirahne, sakewala tusing bolong. Ditu sirahne bek misi bunga mas. Sekancan ane kena cototine makejang misi emas. Ditu I Crukcuk Kuning nunden Ni Bawang apang ka umah dadongne. Teked di Umah dadongne ia nuturang saparindik awakne dadi buka keto.

Buin mani semengane teka Ni Kasuna ngidih api bakal anggone nyakan. Ditu tepukina Ni Bawang Nganggo sarwa masmasan. Ni Bawang nuturang I Crukcuk Kuning Ane maang di alase. Mara keto Ni Bawang nutur laut Ni Kasuna malaib embokne, ngajap apang teka I Crukcuk Kuning. I Crukcuk Kuning laut nyototin lelipi, teledu muah sekancan kumatap kumitip ane nyengkalen. Ditu Ni Kasuna ngeling gelalang geliling muntagmantig naanang sakit awakne sambilanga malaib mulih. Teked jumahne memene uyut tulung-tulung nepukin pianakne buka keto. Baan liune matatu tur awakne beseh dadi Ni Kasuna Tusing nyidaang naanang lantas ia mati.

Nah keto anake ane demen misunayang timpal, sehananing ane kalaksanayang pastika pacang nemonin pikolih manut sekadi karmane. Ala ulah ala tinemu, ayu kinandi ayu pinanggih.