Satua Bali I Lutung Dadi Pecalang

 I LUTUNG DADI PECALANG

 

Inggih Ida Dane sareng sami sane wangiang titiang, sadurung titiang nyaritayang satuane "I Lutung Dadi Pecalang", pinih riin ngiring ngaturang panganjali umat,

"Om Swastyastu"

 

Kacrita I Singa madeg ratu merintah sakancan burone di jagate. I Lutung ane dadi pecalang. Wireh keto, nyabran dina I Lutung mideran nabdabang kakertan jagat. Baan kenyelne majalan kema mai, lantas ia maembon beten kayune gede, done ngrembun.

Sedek nyongkok anggut-anggut naenang kiap, I Lutung tengkejut ningeh munyin kulkul bulus : tuk, tuk, tuk. Sepanan ia bangun, kipak-kipek liatne marengang. Saget tepukina I Blatuk ngulkul di punyan kayune.

I Lutung nyerit raosne bangras, "Ih Blatuk, ngudiang iba ngulkul bulus? Tingkah ibane buka kene ngranaang gumine mabiayuhan. Enggalang orahang teken awake".

I Blatuk ngenggalang tuun, tumuli ngraos dabdab, "Inggih Jero Pecalang tiang ngulkul wireh jagate biuta, aro-aro nandang pakeweh. Sawireh I Capung Bangkok ileh-ileh ipun makta tumbak poleng. Sapunika taler I Kakul, I Tumisi, I Kekua sami rarud ngaba umah nyane, miwah I Kakawa tan rerenan ipun masang jaring. Mangkin jerone sane patut ngayunin, sampunang iju duka ring dewek titiang".

I Lutung kabilbil tumuli nglanturang majalan, lantas tepuka I Tumisi mondong umahne. I Lutung ngenggalang maekin laut matakon, "Ue Tumisi, dadi iba nyrutcut mondong umah?".

I Tumisi matolihan lantas masaut, "Inggih Jero Pecalang, awinan tiang rarud makta umah, awinan I Kunang-kunang setata milehan makta api. Manah titiang jejeh pet ipun nunjel umah titiange".

Mara keto I Tumisine, I Lutung brangti pesan, matanne barak tumuli gegancangan majalan ngalih I Kunang-kunang. Tusing mekelo majalan saget tepukina I Kunang-kunang di tengah umahne. I Lutung nyagjagin sarwi ngucap, "Ue Kunang-kunang mai malu". I Kunang-kunang matolihan lantas maekin I Lutung. I Kunang-kunang ngucap, "Nawegang Jero Pecalang, napi wenten karya, dados nembe ngrereh titiang?".

I Lutung macegik mamunyi, "Ye ngudiang iba tandruh? Pelih ibane ileh-ileh ngaba api, ngawinang gumine mabyayuhan, liu anake rarud ngaba umahne". I Kunang-kunang dabdab nyaurin, "Mangkin dumun Jero Pecalang, awinan titiang ngaba api, seantukan I Beduda sadina-dina ngae bangbang di margi-margine, yan ten titiang makta suluh sinah titiang maclempung ka bangbange. Ledang sane mangkin Jero Pecalang sane nepasin".

I Lutung magebras pedih lantas majalan maseserep ngalih I Baduda. Saget tepukina I Baduda nyingkrung di samping gookne. I Lutung matakon, "Ih Baduda corah, dadi iba ngawag-ngawag ngae bangbang di jalane? Laksanan ibane ngawinang gumine biut".

I Baduda masaut dabdab, "tetujon titiange ngae bangbang pacang anggen titiang nanem bacin I Lembune sane mabyayuhan ring margine, mangda margine bersih. Iwangke laksanan titiange kadi asapunika?".

I Lutung maplengek, lantas ngerimik, "Nah yan keto unduke, I Lembu ane ngae gumine biuta. Jani awake maan ngwales corah laksanan ibane maluan". I Lutung magebras gegancangan majalan ngalih I lembu.

Kacrita I Lembu sedek medem-medeman ngilag padang, jeg teka I Lutung, pejalane encol, kipekane marengang. I Lembu nyapa alon, "Inggih Jero Pecalang pacang lunga kija mangkin?". I Lutung masaut bangras, "Ih Lembu, iba mula demen ngletehin gumi, kema mai miayagang bacin. Iba patut kena danda pati. Iba lakar repotang kai teken Sang Prabu Singa". I Lutung lantas majalan ngruruh I Singa.

Di Arep I Singane, I Lutung masila tiding, I Singa ngraos, "Ih Lutung, adake iba nepukin pakeweh nabdabang gumi?", I Lutung nyaurin, "nawegang Ratu Sang Prabu, ipun I Lembu sane purun tempal ring I Ratu". Mara keto raosne I Lutung, I Singa pedih pesan, "yan keto unduke jalan alih jani I Lembu". I Singa ajaka I Lutung lantas majalan nguruh I Lembu.

Critayang I Lembu katemu I Lelasan. I Lembu ngorahang dewekne repotanga teken I Lutung. Sinah ia lakar sarapa baan I Singa. I Lelasan seken ngraos, "uduh Lembu, da jejeh, saenun kaine idup, tonden karoan iba lakar mati, awake misadia nandingin I Singa".

Buin kijepne saget teka I Singa ajaka I Lutung. I Singa nyagjagin I Lembu, I Lelasan encol nambakin sambilanga mamunyi bangras, "Ih iba singa, kai tandingin malu, yan kai suba mati, mara iba dadi nyarap I Lembu".

I Singa mamunyi bangras, "Ih Lelasan, nyalah-nyalah kai nglawan iba, gediang awak ibane, dosan I Lembu gede pesan, pantes ia kena danda pati". I Lelasan ngucap, "Ih Singa, bobab ibane nilun kuping, eda iba liunan peta, mai matanding kapurusan". I Singa marirak laut nyagrep. I Lelasan sebet makelid, tendasne ngigel, ikutne kutal-katil. I Singa pedih, laut ngangsehang nguber I Lelasan encol makecog katunggak tiinge. I Singa ngangsehang nyagrep. I Singa nyelempoh lantas mati. Nepukin I Singa mati, I Lutung malaib bah bangun ngungsi alas wayahe.

Inggih Ida Dane sareng sami sane wangiang titiang, amunika prasida antuk titiang nyaritayang satuane "I Lutung Dadi Pecalang". Kirang langkung antuk titiang nyatuang, titiang nunas majeng ring Ida Dane sareng sami Badung Mangupura, kirang langkung titiang nunas ampura. Puputang titiang antuk Paramasanti.

 

“Om Santi Santi Santi Om”