Satua Bali I Sugih teken I Tiwas

Berikut saya bagikan contoh satua Bali atau cerita berbahasa Bali yang mengandung nasehat hidup. Cerita atau satua ini berjudul I Sugih Teken I Tiwas atau Si Kaya dan Si Miskin. Silakan simak cerita di bawah ini, yang mana cerita ini dapat dijadikan naskah mesatua Bali dalam lomba satua Bali.

Inggih Ida Dane sareng sami sane wangiang titiang, sadurung titiang nyaritayang satuane I Sugih teken I Tiwas, pinih riin ngiring ngaturang panganjali umat

“Om Swastyastu”.

I Sugih teken I Tiwas

Ada katuturan satua I Sugih teken I Tiwas. I Sugih anak sugih pesan, nanging demit tur iriati, jail teken anak lacur. I Tiwas buka adane tiwas pesan, nanging melah solahne, tusing taen jail teken timpal. I Tiwas geginane ngalih saang ka alase lakar adepa ka peken.

Nuju dina anu, I Tiwas ka umah I Sugihe ngidih api. Ditu I Sugih ngomong, “ih Tiwas, alihin ja icang kutu, yen suba telah kutun icange, nyanan upahina baas”. I Tiwas ngalihin kutu I Sugihe. Suba tengai mara suud. I Tiwas upahina baas acrongcong, ngenggalang lantas baasne abana mulih laut jakana.

I Sugih jumahne buin masiksikan, maan kutu aukud. Ngenggalang ia ka umah I Tiwase, laut ngomong, “Ih Tiwas ene icang maan kutu aukud, jani mai ulihang baas icange ituni. Masaut I Tiwas, “Yeh baase ituni suba jakan tiang”. Masaut I Sugih, “Nah ento suba aba mai anggon pasilih!”. Nasine ane makere lebeng ento laut juanga konyang ka pancine abane mulih baan I Sugih. Nyanane buin teka I Sugih, Ih Tiwas tuni nyai ngidih api teken saang icange, lantas api teken saange apesel gede juanga baan I Sugih. I Tiwas bengong mapangenan baan lacurne buka keto.

Buin manine I Tiwas tundene nebuk padi baan I Sugih lakar upahina baas duang crongcong. I Tiwas nyak nebuk kanti pragat, upahina baas duang crongcong, laut encol            s jakana. I Sugih jumahne nyeksek baas, maan latah dadua. Encol ia ka umah I Tiwase laut ngomong, “Ih Tiwas ene baase enu misi latah dadua, jani ulihang baas icange, yen suba majakan ento suba aba mai.

Sedek dina anu I Tiwas luas ka alase, krasak-krosok ngaling saang. Saget teka Sang Kidang laut ngomong, “I Tiwas apa lakar alih ditu?” masaut I Tiwas, “Tiang ngalih saang teken paku”. “Lakar anggon gena ngalih paku?” masaut I Tiwas, “lakar anggon tiang jukut”. Ih Tiwas lamun nyai nyak nyeluk jit icange ditu ada pabaang nira teken nyai!”

Lantas I Tiwas nyeluk jit kidange, mara kedenga, limane bek misi mas teken selaka. Suud ento, Sang Kidang ilang, I Tiwas kendel pesan lantas mulih. Teked jumah ia luas ka pande ngae gelang, bungkung teken kalung. I Tiwas jani sugih, pianakne makejang nganggo bungah, lantas ia pesu mablanja. Tepukina I Tiwas teken I Sugih. Delak-delik ia ngiwasin pianak I Tiwase. Buin manine I Sugih ka umah I Tiwase matakon, “Ih Tiwas dija nyai maan mas slaka liu?” masaut I Tiwas “kene embok ibi tiang luas ka alase ngalih saang teken lakar jukut saget ada kidang, nunden nyeluk jitne. Lantas seluk tiang, mare kedeng tiang limane ditu maan mas teken selaka. I Sugih ngencolang mulih.

Manine I Sugih ngemalunin luas ka alase, I Sugih nyaru-nyaru buka anake tiwas, krasak-krosok ngalih saang teken paku. Saget teka sang kidang, “nyen ento krasak-krosok? Masaut I Sugih, “Tiang I Tiwas, uli puan tiang tuara nyakan. I Sugih kendel pesan kenehne, masaut I Kidang, “Ih tiwas mai seluk jit nirane!” Mare keto lantas seluka jit kidange, laut kijem jit kidange, I Sugih paida abana ka dui-duine. I Sugih ngeling aduh-aduh katulung-tulung, “Nunas ica, tulung tiang, tiang kapok!” Teked dipangkunge mara I Sugih lebange. Teked jumahne lantas ia gelem mekelo laut ngemasin mati. Keto upah anake loba tur iri ati.

 Inggih Ida Dane sareng sami sane wangiang titiang, amunika prasida antuk titiang nyaritayang satuane I Sugih teken I Tiwas. Kirang langkung antuk titiang nyatuang, titiang nunas geng rena sinampura.

Maguyang di sisin pasih, ampurayang lan terima kasih.

“Om Santi Santi Santi Om”